Egunerokoa
Irudia: Lina Bo Bardi
Egunerokoa da
ez zarela aske edo aske ere bazarela ohartzea.
Ohartzea askatasunari indarra emanez gero
erortzen diren kontrapisuen antzera
jaurtitzen zarela zelai zabalera
oinutsik eta besoak zabal
eskuak ireki dituzun
keinu berarekin begietan.
Ohartzea, aldapan goian txikia ikusten zenuen
harria
amilka datorkizula gainera 
eta ez dizula ikusten utziko
askatasunak ezkutatzen zuen betebeharra
harriak itsuak diren
aske hartu gabeko erabakiak bezala.
Ordua da,
eskuak atzera bota eta
aurrera egin behar duzula ulertzeko,
egunerokoa baita
ez zarela aske edo aske ere bazarela erabakitzea.