Erabiltzailearen balorazioa: 5 / 5

Star ActiveStar ActiveStar ActiveStar ActiveStar Active
 
 
luma26  

- Kontuz, denok bazterrera, badatorrela, badatorrela

-Ez dit denborarik ematen.

-Ni heldu naiz ertzeko zulora.

-Etzan zaitez, eta burua harri artean jar ezazu.

-Belauna urratu dut.

-Zer ote da ukitu dudan zera bigun hau?

-Badator. Gainean da.

-A ze zaratatzarra!

-Kaka zaharra! Koipe beltza.

-Geldi denok.

Rrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrr

-Gero eta toki arriskutsuagoetara etortzen gara.

-Aspertzen ari naiz jolas honekin.

-Zahartzen ari zara, ezta?

-Agian.Uste dut, jadanik, ez nauela honek lehen bezala betetzen.

-Nola igartzen den mutil berria aurkitu duzula.

-Ez da hori.

-Gau guztia gabiltza hemen, lur azpian, ilunetan. Bi kilometro egin ditugu, ia trenak harrapatu gaitu. Zikin zikinak gaude. Eskuak beltz-beltz eginda ditut.

-Koipeki alu hau.

-Orain bi urte merezi zuela zenion.

-Hala izango zen, baina orain...

-Badator hurrengoa.

-Sar gaitezen hurrengo babeslekuan.

-Argi ibili, astia badugu eta.

-Lotu hormari.

-Eutsi lepoak.

Rrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrr

-Argia ikusten dut, eskuinean. Heldu gara.

-Ea egia den.

-Hemen gelditzen dituzte bagoiak.

-Aupa! Sei, zazpi; han atzean beste bat, zortzi bagoi daude.

-Denak guretzat.

-Denak garbi-garbi.

-Hala. Berriketa gutxiago, eta ekin lanari.

-Bost minutu ditugu, hurrengoa etorri eta lehenengoa eraman arte.

-Zer egingo dugu?

-Bakoitzak bat hartu, eta irudiz bete, noski.

-Gure artea garatu.

-Erdikoak egingo ditugu.

-Ez dira konturatuko, jende artera doazen arte.

-Hori da artista batentzat handiena. Milaka begik zure lana ikustea.

-Zarata berriz ere.

-Ez egin kasorik, jardun.

Rrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrr

-Zer ideia daukazu gaurkorako?

-Lur azpiko itsasoa.

-Ideia galanta.

-Tiburoiak, izurdeak,

-Txitxarroak,

-Ba al dakizu, ba, txitxarroak nolakoak diren?

-Ez ta ideiarik ere. Niretzat arrainak denak antzekoak dira. Arrandegietan ikusten ditut. Ez dut inoiz arrainik jan.

-Berdin dio. Txitxarroak berdez egingo ditugu, eta bisiguak gorriz.

-Bisigurik ez dago barren, jadanik.

-Nik ez dakit, kalekume pijoa naiz, eta legatza bakarrik ikasi dut jaten.

-Ixo!

-Norbait dator.

-Bai zera, trena da berriz ere, baina urrutian.

Rrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrr

-Nik erdia margotu dut.

-Nik oraindik ez.

-Luzeena hartu duzu ta, Bilbotarra ematen duzu.

-Naizelako.

-Eta, hori zer da?

-Polipoa, eta hura, belakia.

-Bizkarra garbitzekoa dirudi.

-Noski, nondik ateratzen direlakoan, bada, benetako belakiak?

-Jendeak ulertuko du?

-Bai, neska, dokumentalak ikusi dituzte metroan dabiltzanak.

-Itsaso azpiak baino gehiago.

-Orain Neptuno egingo dut.

-Hiriko alkatea ematen du.

-Nahita egin dut, hiruhortzekoa eta guzti.

-Bibotea falta.

-Ta mala letxea.

-Hori ezin diot jarri, baina bibotetxo hitlerianoa bai.

Rrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrr

-Beno, hau izango da nire azken ekintza.

-Zer diozu?

-Bai, ez dut jarraituko. Hemendik aurrera beste norbait bilatu beharko duzue.

-Bai zera!

-Bai, bai, erabaki dut, eta ez dut atzera egingo.

-Ba, azkena izango bada, sekulakoa egingo dugu.

-Metro osoa itsaso bihurtuko.

-Hori da, azkena berezia izango da, itsasoa.

-Itsasoa metroan!

-Erabat berezia. Jaso eskuak.

-Zer?

-Jaso eskuak, hau sarekada da.

-Utzi margoak lurrean.

-Sarekada!

-Arrainak bezala harrapatu gaituzte!

-Hau izango da zuen azken ekintza.

-Hau izango da gure azken ekintza.

-Itsasoa metroan!

-Etorkizuna asmatzeko dohaina daukazu?

Rrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrrr

Iñaki Odriozola

Mesedez! Webgune honek cookieak eta antzeko teknologiak erabiltzen. Informazio gehiago