Txantxangorria

Intxaur arbola lehortuan
txantxangorria, txikia
kabitik atera berria,
paparrean luma berritzen
kolore gorria zaio sumatzen.
Suaren indarrez
badaki abesten,
asmatuko ote du kantuak
zuhaitza esnatzen?

Ba al da txorien kantua bezain gauza ederrik?
Bai, urrutiko haurren jolasaren zurrumurrua.
Eta behe lainoa bezain gauza misteriotsurik?
Egunero beltzez jantzita doan emakumea.
Eta arrosaren usaina berdindu dezakeenik?
Izkinako okindegiari dariona, goizeko orduetan.
Eta bada zelai berdean loreek eskaintzen duten kolorea
bezain bizirik?
Bai, hiriko argiek gauari ematen diotena.